डोंबिवली रामनगर पोलिसांनी केली १९ वर्षीय तरुणास अटक, तब्बल १ लाख ३० हजाराच्या सायकली चोरल्या.
डोंबिवली : डोंबिवली रामनगर पोलिसांनी या आरोपीकडून 1 लाख 30 हजार रुपये किंमतीच्या 13 सायकल जप्त केल्या आहेत. या आरोपींनी अजून किती सायकली चोरला याचा तपास पोलीस करत आहेत. कल्याण डोंबिवली परिसरात चोरांचे प्रमाण वाढले असून कल्याण डोंबिवलीकर सायकल चोरांना अक्षरश: वैतागले आहेत. विशेष म्हणजे गेल्या काही दिवसांपासून डोंबिवलीतील रामनगर पोलीस ठाण्याच्या अंतर्गत अनेक सायकल चोरीचे गुन्हे दाखल झाले आहेत.
पोलिसांनी सीसीटीव्हीचे आधारे आरोपी ज्या रस्त्यावरून येत होते, त्यावर पाळत ठेवून संशयित 19 वर्षीय हसमितसिंग जसमेरसिंग सैनी आणि एका अल्पवयीन मुलाला ताब्यात घेत विचारपूस केली असता, दोघांनी चोरीची कबुली दिली. विशेष म्हणजे हे आरोपी दिव्यात राहत असून, दिव्यातून ट्रेनचा प्रवास करून डोंबिवलीत यायचे. डोंबिवलीमध्ये सोसायट्यांमधून महागड्या सायकलींचे लॉक कटावणीच्या मदतीने तोडून त्या सायकली चालवत दिव्यापर्यंत न्यायचे. दिव्यात त्या सायकली कमी किमतीत विकायचे.
रामनगर पोलीस ठाण्याचे वरिष्ठ पोलीस निरीक्षक सचिन सांडभोर यांच्या मार्गदर्शनाखाली डोंबिवली पोलीस ठाणे गुन्हे प्रकटीकरण पथकाचे सहायक पोलीस निरीक्षक योगेश सानप, सहायक पोलीस निरीक्षक बळवंत भराडे, पोहवा. विशाल वाघ, पोहवा. भणगे, सचिन भालेराव, लोखंडे, कोळेकर, राठोड, कोटी, रायते, निलेश पाटील, गिरीश शिर्के यांचे विशेष पथक बनवून शहरातले सीसीटीव्ही तपासणी करत चोरट्याचा शोध घेऊन आरोपीला अटक केली व जप्त मुद्देमाल मूळ मालकांना सुपूर्त करण्याची प्रक्रिया सुरू करण्यात आली आहे.
