भिवंडी : भिवंडीतून धक्कादायक घटना समोर आली आहे. चुकीचे तीन इंजेक्शन्स देण्यात आल्याने चारवर्षीय चिमुकलीचा मृत्यू झाला आहे. शहरातील सनलाईट हॉस्पिटलमध्ये ही घटना घडली असून त्यानंतर आता संतप्त नातेवाईकांनी रुग्णालयाची तोडफोड करत आरोपींवर कायदेशीर कारवाई करण्याची मागणी केली आहे. श्रद्धा कांबळे असं मृत्यूमुखी पडलेल्या चिमुकलीचं नाव असून तिच्या नातेवाईकांनी डॉक्टर परिचारिकेला मारहाण केल्याची माहिती आहे. या धक्कादायक घटनेने भिवंडीत खळबळ उडाली असून स्थानिक पोलिसांनी तातडीने घटनास्थळी धाव घेतली आहे.
श्रद्धा कांबळे या चिमुकलीला उलट्या होत असल्याने वडील नितीन कांबळे यांनी मुलीला उपचारासाठी भिवंडीच्या सनलाईट रुग्णालयात दाखल केलं होतं. रात्री आठ वाजेच्या सुमारास डॉक्टरांनी चिमुकलीला लागोपाठ तीन इंजेक्शन दिले, त्यानंतर अचानक चिमुकलीची प्रकृती बिघडली. बेशुद्ध झाल्यानंतर काही वेळातच डॉक्टरांनी श्रद्धाला मृत घोषित केलं. श्रद्धाच्या मृत्यूची बातमी कळताच तिच्या नातेवाईकांनी रुग्णालयात संताप व्यक्त करत तोडफोड करण्यास सुरुवात केली. मृत चिमुकलीच्या वडिलांनी डॉक्टर परिचारिकेला मारहाण केल्याची माहिती आहे. त्यानंतर आता घटनेची माहिती समजताच स्थानिक पोलिसांनी तातडीने घटनास्थळी धाव घेत स्थिती आटोक्यात आणली आहे.
पोलिसांनी हस्तक्षेप केल्यानंतर श्रद्धाचे कुटुंबीय शांत झाले असून त्यानंतर मुलीचा मृतदेह शवविच्छेदनासाठी पाठवण्यात आला आहे. मुलीला कोणताही आजार झालेला नव्हता, केवळ उलट्या होत असल्याने डॉक्टरांनी तिला लागोपाठ तीन इंजेक्शन्स दिले. डॉक्टरांच्या हलगर्जीपणामुळेच श्रद्धाचा मृत्यू झाल्याचा आरोप तिच्या कुटुंबियांनी केला आहे. या घटनेनंतर सनलाईट रुग्णालय प्रशासनाने कांबळे कुटुंबियांवर गुन्हा दाखल केला आहे. पोलिसांनी या प्रकरणाची चौकशी सुरू केली असून चिमुकलीच्या शवविच्छेदनाचा अहवाल समोर आल्यानंतरच नेमकं काय घडलं होतं, याचा खुलासा होणार आहे.
